CEBU, Philippines - Gipaabot nga mokusog pa ang hanging habagat nga masinati dinhi sa Kabisay-an ug Mindanao apil na ang katag-katag nga mga pag-uwan nunot sa pagsulod sa bagyong Pepeng nga anaa sa hurisdiksiyon sa Pilipinas.
Subay sa labing uwahing weather bulletin sa PAG-ASA Mactan kagahapon sa alas 11 sa buntag gipadayag ni weather forecaster Luciano Villamor sa dihang nahinabi sa Banat News nga ang bagyong Pepeng padayong nagkakusog ang hangin paingon sa Northern Luzon ug Metro Manila.
Matud pa ni Villamor sa alas 10 sa buntag kagahapon ang mata sa bagyo nasigpatan 520 kilometros sa Borongan, Eastern Samar ug nagdala’g hanging may gikusgon nga 175 matag takna ingon man unos nga 210 kilometros matag takna.
Ang bagyong Pepeng nag-irog sa kasadpang amihanan kasadpan sa 24 kilometros matag takna ug gipaabot nga mopaingon sa silangang bahin sa Virac, Catanduanes karung buntag ug 80 kilometros gikan sa silangang bahin sa Kasiguran, Aurora.
Pagka-Sabado sa buntag gipaabot nga masigpatan ang maong bagyo 160 kilometros sa silangang Tuguegarao City ug pagka-Domingo sa buntag mopaingon sa amihanang kasadpan sa Laoag City sa kusog nga 60 kilometros matag takna.
Ang mga lugar nga gipaubos sa public storm signal number one sugod kagahapon sa buntag mao ang Camarines Norte, Camarines Sur ug Catanduanes.
Gipahimangnoan sa PAG-ASA ang mga apektadong lugar nga magbantay sa mga pagbaha ug landslide.
Nasayran nga dul-an sa 300 ang patay ug liboan ka pamilya ang apektado sa bagyong Ondoy niadtong miaging semana nga nakamugna og dakung baha sa Luzon. (BANATNEWS)