Liboang Senior Citizen mitambong sa selebrasyon

CEBU, Philippines - Libuan ka mga senior citizen sa siyudad sa Sugbu ang nitambong sa pormal nga pagbukas sa Senior Citizen’s Month kagahapong adlawa sa Plaza Sugbu.

Gani ang 3 mil ka ostiyas nga gidala ni Monsinyor Roberto “Boy” Alesna sa Cebu Metropolitan Cathedral nga maoy ni-officiate sa Holy Mass nagkuwang atol sa pagpangalawat.

Matud sa chairman sa Cebu City Senior Citizens’ Council nga si konsehal Rodrigo Abellanosa nga kini nagtimaan lang sa kaaktibo karon sa mga edaran sa dakbayan.

Kini gihangop usab ni Abellanosa tungod kay giingong ubay-ubay nga mga kalihukan ang ilang giandam alang sa tibuok buwan nga kasaulugan.

Usa na niini ang pagpahigayon og ‘Tabo sa Senior Citizens’ karong adlawa diha sa Plaza Sugbu diin mapalit ang nagkadaiyang mga produkto sa mga senior citizen.

Dunay ipahigayon usab nga medical mission karong Sabado diha gihapon sa Plaza Sugbu diin ang mga senior citizen ra usab ang makapahimulos niini. Pipila usab ka mga forum ang pasiugdahan sa kagamhanan sa dakbayan nga alang gihapon sa mga senior citizen nga naglakip na sa Senior Citizens’ Congress.

Tapuson ang kasaulugan sa Senior Citizens’ Month karong Oktobre 31 pinaagi sa pagpahigayon sa Barrio Fiesta diha gihapon sa Plaza Sugbu.

Dungan usab niini mao ang pagpurong-purong sa mapili ug mamahimo unyang “Matron Queen” sa mga kandidatang senior citizen.

Nagkanayon si Abellanosa nga ang tumong sa pagsaulog sa Senior Citizens’ Month mao ang pag-ila sa kapabilidad sa mga senior citizen bisan pa man sa ilang pangedaron.   Elly Bolonos) (BANATNEWS)