Sunog sa mandaue; 1 Patay

CEBU, Philippines -Usa ang patay samtang sobra sa 30 ka panimalay ang naugdaw sa sunog nga nahitabo sa Villa Manga, barangay Opao dakbayan sa Mandaue kagahapon sa udto nga gituhoang kini tinuyo.

Atol sa imbestigasyon ni Mandaue City Fire Marshall, Chief Inspector Oscar Mayol ug SFO1 Roy Garcia naugkat ang napaig nga patay'ng lawas ni Eulalia Ytol, 56, minyo ug residente sa maong dapit.

Base sa pamahayag ni Willy Ytol (bana sa biktima) nakagawas na unta ang iyang asawa sa ilang panimalay apan kalit kining mibalik sa ilang balay kay dunay importanteng gikuha uban sa iyang anak nga babaye nga si Jennifer Delante.

Matud pa ni Delante iyang nabiyaan ang iyang inahan human kini makuyapi sulod sa ilang panimalay nga gikaon na sa kalayo ug gumikan kay lisod na kaayong makaduol iya nalang gibiyaan sa kabalakang hasta siya maapil og kasunog.

Gibanabana sa kabomberohan nga moabot ngadto sa 30 kapin ka panimalay ang naugdaw atol sa maong sunog nga giingong nagsugod sa panimalay ni Maymay Soronio ug Randy Soronio.

Ang kalayo daling mikatap sa mga kasikbit nga panimalay nga halos kadaghanan ginama sa mga gaay ug sikitsikit ang pagkabutang.

Apan ang barangay kapitan sa Opao nga si Joy Ouano dunay nadawat nga report nga usa ka batang 5-anyos ang nakakita kung kinsa ang miduslit og kalayo sa maong panimalay.

Sa pakighinabi sa Banat news sa maong bata uban sa inahan niini nga si Ruby Soronio iyang gitumbok ang usa ka Jessa Canoy nga maoy midagkot og posporo sa usa ka nagtipun-og nga plastic sa likod nga bahin sa panimalay sa mga Soronio ug ang posporo gilabay ni Jessa ngadto sa kasilyas.

Samtang si Ruby Soronio mitug-an nga sa milabay'ng semana nagkalalis sila ni Jessa ug mibahad kining sunogon ang ilang panimalay ug wala kini magdahom nga tinud-on ang maong bahad.

Ang kabomberohan misusi na sa maong report nga posibleng arson ang nahitabo.

Samtang si Mandaue City Mayor Jonas Cortes personal nga miadto sa maong dapit mimando na sa iyang mga sakop sa CSWS sa paghimo og preparasyon alang sa pagkaon sa mga nasunogan ug uban pang hinabang.

Hugpongon usab ni Cortes ang City Disaster Coordinating Council sa dakbayan aron pagdeklarar sa maong dapit ubos sa state of calamity aron makapagawas og calamity fund aron itabang sa mga nasunogan.

Nadawat sa kabomberohan ang alarma alas 11:24 kagahapon sa udto ug giisa dayon ngadto sa Task Force Alpha samtang hangtod ning pagbalita padayon pang gisusi kung pila ang kantidad sa danyos sa maong sunog. (BANATNEWS)