Wa mo-isyu og resibo gipasirad-an

CEBU, Philippines - Gipangkandaduhan sa Bureau of Internal Revenue (BIR) ang pipila ka mga balay patigayon sa Metro Cebu kagahapong adlawa tungod usab sa kapakyas niini pagbayad sa tukmang buhis, ug sa uban pa niining kalapasan nga nalatid sa National Internal Revenue Code.

Lakip na niini ang pagdumili pag-issue og resibo, pagdeklarar lang og gamay sa ilang gross sales nga wa kaabot sa 30 porsiyento ug uban pa subay sa pagpatuman sa Oplan Kandado Program.

Unang gisirhan sa BIR mao ang usa ka hardware sa siyudad sa Lapu-Lapu ug gisunod niini ang Neophontek Enterprises sa Osmeña Boulevard sa dakbayan sa Sugbu.

Onse ka mga balay patigayon dinhi sa Metro Cebu ang gitakdang sirad-an sa BIR kagahapon tungod gihapon sa kapakyas pagbayad sa tukmang buluhisan lakip na niini ang usa ka branch sa sikat nga pizza outlet sa mga dalan Colon sa siyudad sa Sugbu.

Matud pa sa regional director sa BIR, Rodita Galanto, nga ilang nasuta nga ubay-ubay nga mga kalapasan ang nahimo sa maong mga establisamento hinungdan nga ilang sirad-an.

“Ma-subject ka sa Oplan Kandado kung hindi ka nag-issue ng receipt, hindi ka nag-file ng return, nag-under declare ka ng 30% at saka hindi ka nag-register, isa lang doon ang violation mo, close kana basta VAT ka,” sumala ni Galanto.

Giingong mapaubos sa Value Added Tax (VAT) ang usa ka establisamento kung kini mohalin og labing minos P4 mil matag adlaw.

Gipadayag ni Galanto nga naalkanse ang panudlanan sa gobiyerno tungod sa pagdumili sa ubang mga establisamento pagbayad sa tukmang buhis. (Elly Bolonos) (BANATNEWS)