CEBU, Philippines - Usa ka patay’ng lawas sa lalaki nga gituohang gi-salvage ang nakit-an nalang nga gisulod og sako ug gilabay sa usa ka fishpond sa barangay Dawis Sur lungsod sa Carmen kagahapon sa alas 5:30 sa buntag.
Ang mananagat nga si Deomides Lucenio, molupyo sa maong lugar maoy nakadiskubre sa maong patay’ng lawas sa tawo nga gisulod sa sako nga gilabay sa maong fishpond dihang pag-agi niya sa maong lugar ug gipahibalo ang kapitan sa barangay nga si Ranulfo Ybañez kinsa mao say mipahibawo sa kapulisan. Matud ni SPO2 Simplicio Gibo sa Carmen Police dihang nahinabi sa Banat News ang biktima dunay dakung samad pinusposan sa ulo nga maoy gituohang hinungdan sa kamatayon niini ug pagkahuman gisulod sa sako dayun gilabay sa maong lugar. Gituohan ni SPO2 Gibo nga taga laing lugar ang biktima ug gilabay lang sa ilang lugar sanglit walay bisan usa sa mga molupyo ang nakaila niini.
Ang biktima gihulagway nga nagsul-ob og sinina nga kolor puti ug nag-short, kasarangan ang pamanit ug gibana-banang nagpangidaron og 20 ngadto sa 25 anyos ug 5’4 ang gitas-on.
Ang patay’ng lawas sa biktima kasamtangang gihaya sa punerarya sa barangay Dunggo-an siyudad sa Danao samtang nagpaabot sa mga kabanay nga mo-claim niini. Ang kapulisan sa Carmen padayon pang mihimo og subsob nga imbestigasyon pag-ila ug pagtumbok sa biktima ug sa motibo sa krimen ug nanawagan sa mga kabanay nga nawad-an og sakop sa pamilya pagsusi niini basin og ilaha kining sakop sa pamilya. (BANATNEWS)