Tomas di pa mobalik sa city hall

CEBU, Philippines - Hugot na ang desisyon ni   Mayor On-Leave Tomas Osmeña pag-uswag sa iyang bakasyon human mapupos ang iyang sick leave karong adlawa.

Ang mayor nga atua karon sa siyudad sa Zamboanga mitataw nga siya dili mobalik pag-asumer sa katungdanan hangtod mahuman ang imbestigasyon sa kapolisan sa giingong pagpusil sa camera ug pagpanghulga sa iyang anak nga si Miguel ngadto sa amiga sa hinigugma niini pipila ka semana na ang nakalabay.

Gituohan ni Samantha Elise Benitez nga nasuko si Miguel kaniya sa pagtuo nga iyang gibiyaan ang uyab niini sa dihang kini nahubog atol sa ilang panag-inom.

Matud ni Osmeña nga siya maglikay lang nga masaypang mi-impluwinsya sa gipahigayong imbestigasyon sa kapolisan labot sa maong alegasyon.

“I’m not like Gwen who will counter by having her own investigation to investigate herself, tinonto gyud na, and I’m not like Soc Fernandez who will just hang in there,” matud ni Osmeña.

Matud sa mayor nga kun dili mapamatud-an sa kapolisan nga dunay nahimong kasaypanan ang iyang anak, posible nga siya mobalik sa serbisyo.

Dili na usab mopahigayon og survey si Osmeña ngadto sa nagkadaiyang women’s group kun walay reklamo o kaso nga ipasaka batok sa iyang anak.

“If the other party will file a complaint then I will conduct a survey, if not, and there’s nothing will come out in the investigation, I may just come back,” matud ni Osmeña.

Sa iyang bahin, malaumon gihapon si acting mayor Michael Rama nga mausab pa ang desisyon ni Osmeña ug mobalik na sa City Hall ugmang adlawa.

Matud ni Rama nga dili pa karon ang tukmang panahon nga siya maoy modumala sa siyudad tungod kay dunay gipili nga mayor ang mga Sugbuanon.

Wala hinuoy mahimo ang acting mayor gawas sa pagtuman sa iyang katungdanan karon nga nakadesidir na si Osmeña pag-uswag sa iyang medical leave. (BANATNEWS)