Rama miwarning sa badlongon

CEBU, Philippines - Dili angayang magpabilin sa Cebu City Hall ang mga tapulan ug badlungong mga empleyado sa kagamhanan sa dakbayan, bahad pa ni acting mayor Michael Rama human ibutyag ni City Administrator Francisco Fernandez nga daghang tapulan nga mga kawani sa dakbayan.

Ang tapulan nga mga empleyado gihulagway ni Fernandez nga nakapaalkanse sa dakbayan og minilyon ka pesos matag buwan.

Kahinumduman nga gihinginlan na ni Rama ang badlungong mga kawani sa City kaniadto atol sa pagpatambal ni mayor on-leave Tomas Osmeña sa Amerika.

Apan daw sa wala patalinghugi ang acting mayor sa panawagan niini human ibutyag ni Fernandez nga ang maong mga empleyado nagpabilin gihapon sa City Hall.

Si Osmeña mitugyan ngadto kang Rama sa pagdisiplina sa badlungong mga kawani tungod kay wala pa mahuman ang iyang medical leave.

Tungod niini, subling pahinumduman sa acting mayor ang tapulan nga mga empleyado nga magtinarong sa trabaho kung gusto pa niining magpabilin sa pwesto.

“Balik-balikon gyud na kay wa ta kahibawo kung bato na ilang mga huna-huna, puthaw na ilang mga ulo, mao nga sigehan nato og patulo og tubig,” sumala ni Rama.

Gitataw sa acting mayor nga siya wala pay laing mahimo gawas sa pagpahinumdum sa mga kawani samtang nagpaabot pa sa desisyon sa mayor. (Elly Bolonos)   (BANATNEWS)