Granada miulbo 1 patay, polis angol

CEBU, Philippines - Patay ang usa ka 39-anyos nga lalaki ug naangol ang usa ka polis human moulbo ang granada kagahapon sa sitio Harag barangay Talavera dakbayan sa Toledo.

Ang namatay giilang si Nelson Hernane, residente sa barangay Daanlungsod sa nahisgutang dakbayan.

Samtang ang naangol ug gihulagway nga talandugon ang kahimtang mao ang polis nga si PO3 Revocato Gesite nga usa sa mirespondeng polis sa dapit.

Sumala pa ni SPO1 Praxido Albiso, imbestigador sa Toledo City Police Station, usa ka concerned citizen ang mitawag sa ilang buhatan ug mipahibalong dunay usa ka lalaking nasigpatang nagdala og armas diha sa ilang barangay.

Nunot niini si PO3 Gesite ug mga kaubanan miadto sa dapit ug dihang ilang nasigpatan si Hernane ilaha kining giduol ug gimandoan sa pagtahan sa kaugalingon. 

Apan gikatahong imbes nga mopatuo kalit kining mibunot sa usa ka granada ug kalit kining mibuto. Ang pagbuto miresulta sa kamatayon ni Hernane ug pagkaangol ni Gesite kinsa diha ra sa duol sa namatay.

Wala pa matino kun gituyo ba ni Hernane ang pag-ibot sa pin sa granada maong kini mibuto.

Sumala pang PO3 Jerson Lebumfacil sa Toledo City Police Station sa pakighinabi sa Banat News nga pista sa maong barangay nianang tungura ug dunay misumbong kabahin sa maong lalaking nagdala og armas. Atol ning pagsulat sa balita padayon pa ang gihimong imbestigasyon ni SPO1 Albiso pagtino sa hitabo samtang gidala na sa usa sa mga tambalanan sa dakbayan sa Sugbu ang naangol nga polis. BANAT NEWS