Maestro nag-internet gitulis

CEBU, Philippines - Usa ka magtutudlo, kauban sa mga customer sa usa ka internetan gihimulbolan sa ilang kuwarta ug mga butang pinaagi sa duha ka wala hiilhing tulisan didto sa barangay Poblacion lungsod sa Carmen sa miaging gabii.

Ang maong magtutudlo mao si Jilito Ares Yke Dumaguil, 32, magtutudlo sa Catmon-Daan Elementary School.

Si Dumaguil nakuhaan sa iyang cellphone ug P4 mil cash, samtang nakuhaan usab og P350 ang duha ka kauban niyang mga customer sulod sa internet café nga gipanag-iya sa usa ka Edcel Apor.

Ang mga biktima nagtibi nga misumbong sa kapolisan sa Carmen nga nagkanayon nga samtang nalingaw sila og duwa sa internet kalit lang miabot ang duha ka armadong tawo uban sa pagpahibawo nga tulis.

Gumikan sa kahadlok nga pamusilon sila gihatag nalang nilang malinawon ang ilang kuwarta ug cellphone ngadto sa maong mga tulisan kinsa maoy gipangita karon sa kapolisan sa maong lungsod.(Guam Logrono) BANAT NEWS