Mga batan-on sa uptown giseminar bahin sa druga

CEBU, Philippines - Gatusan ka mga batan-on gikan sa onse ka mga barangay sa dakbayan sa Sugbu ang gipaubos sa drug awareness seminar sa miaging semana.

Ang mga batan-on nagagikan sa mga ibabaw nga barangay ning siyudad nga nakasuway na sa paggamit og ginadiling drugas.

Partikular nga gipaubos sa seminar mao ang mga batan-on gikan sa barangay San Antonio, Kamputhaw, Capitol Site, Santa Cruz, Cogon-Ramos, Sambag I, Sambag II, Kamagayan, Day-as, Carreta ug barangay Zapatera.

Ang nahisgutang mga barangay nahisakop usab sa hurisdiksyon sa Cebu City Progressive Uptown Movement (CC-P.U.M) nga maoy nagpasiugda sa kalihukan.

Lakip sa mga namulong sa maong seminar mao si Superintendent Paul Labra II sa Cebu City Police Office, Joling Lazarte sa City Office for Substance Abuse Prevention, ingon man ang mga representante gikan sa Philippine Drug Enforcement Agency (PDEA-7) ug uban pa.

Sama sa gipaabot, ang mga speaker mipasabot ngadto sa mga nanambong bahin sa dili maayong epekto sa utok ug panglawas ang paggamit ug ginadiling drugas.

Sa iyang bahin, ang presidente sa CC-P.U.M nga si William Hillbitch mipadayag nga gikinahanglan na ang hiniusang tinguha karon sa pagsumpo sa maong problema nga iyang gihulagway nga susama sa usa ka mananakod nga sakit nga nagduwa sa kadalanan sa dakbayan.

Kini tungod sa naobserbahan ni Hillbitch nga halos tanang kabatan-onan diha sa kadalanan migamit na sa ginadiling drugas.

Nagtoo hinoon si Hillbitch nga ang mga opisyal sa barangay sa siyudad mihimo usab og mga lakang pagsumpo sa nahisgutang problema.

Apan gipadayag sa presidente sa CC-P.U.M nga mas maayo kung maghiusa ang kabarangayan sa kampanya niini batok sa ginadiling drugas.

Ang CC-P.U.M maoy grupo sa mga magpapatigayon diha sa uptown area nga nipasalig pagtabang sa mga programa sa kagamhanan sa dakbayan ilabi na sa pagpalambo sa business environment sa siyudad. (Elly Bolonos) BANAT NEWS