Palumba sa iro gisupak

CEBU, Philippines - Ang People for the Ethical Treatment of Animals kon PETA Asia milusad og kampanya batok sa napasar nga House Bill 5292 ug House Bill 5648 nga naghatag og pagtugot sa katukoran sa “greyhound racetracks” kon lumbaanan sa mga iro dinhi sa Sugbu, sa Tarlac, sa Pampanga ug sa Laguna.

Sila si Rochelle Regodon, campaign manager ug Ashley Runo sa PETA Asia mitug-an sa Banat News nga ilang gihingusgan ang paglusad sa “Ad campaign to kill greyhound racing bills,” human napasar ang duha ka balaudnon sa Ubos Balay balaoranan.

Ilang gihulagway ang maong balaudnon nga usa ka matang sa sports nga sama og nagpaantos ug nagpatay sa gatusan sa mga iro sa nasud hinungdan nga angayan kining babagan.

Gani sa Estados Unidos, 34 ka mga estado ang ni-ban sa lumba sa dagan sa iro tungod kay gikonsiderar kini nga “cruel” o bangis nga pagtratar sa binuhing iro.

Si Regodon ug Fruno mitug-an usab nga ubay-ubay usab sa ilang nakuhang records nagpakita nga ang ang mga iro nga dili na makaapil og lumba sa dagan tungod sa injuries gipang-abandonar ug gibiyaan na lamang nga mamatay sa gutom, gipusil, panglumsan, bitayon, pakuryentehan hangtud mamatay samtang ang uban gibaligya sa mga laboratoryo aron magamit sa eksperimento. (Chester Abadilla)  BANAT NEWS