Sikyu gipusil sa kauban

CEBU, Philippines - Nalandig sa tambalanan ang usa ka security guard human kini unaya sa pagpusil sa iyang kaubang sikyu samtang nag-duty sila sa Tabunok Sports Complex, dakbayan sa Talisay kagahapon sa kaadlawon.

Ang biktima mao si Godofredo Sabrosa, 38. taga barangay Basak- Pardo, dakbayan sa Sugbo, security guard nga ubos sa Equator Knights Security Agency samtang ang suspetsado mao si Segundo Espinosa, hingkod ug usa usab ka sikyu nga kauban sa biktima. 

Base sa imbestigasyon sa mga polis nga samtang diha sa ilang duty ang biktima ug ang suspek gikomprontase sa naulahi ang biktima kabahin sa iyang sweldo. Dihang gitunol na unta sa biktima ngadto sa suspek ang sweldo niini kalit siyang gipusil sa naulahi ginamit ang iyang service firearm.

Ang biktima kinsa nasabak sa tiil daling gihatod ngadto sa Don Vicente Sotto Memorial Medical Center samtang ang suspetsado gipangita pa karon sa kapolisan human kini moikyas. (Brenda D. Batuto) BANAT NEWS