CEBU, Philippines - Gikasal na sa hingpit ang 119 ka paresang dugay na ug ang uban bag-ohay pang nagpuyo-puyo sa gihimong mass wedding kagahapong adlawa nga gipasiugdahan sa kagamhanan sa dakbayan sa Sugbu.
Ang 119 ka paresan nagbinayloay sa ilang panumpa diha sa Cebu Metropolitan Cathedral uban sa ilang mga kabanay ug mga mibarog nga mga sponsors nga si acting mayor Michael Rama, kongresista Raul del Mar ug asawa ni mayor on-leave Tomas Osmeña nga si Margot ug ubang mga konsehal sa siyudad.
Kini na maoy ika-upat nga higayong ang dakbayan mipasiugda og mass wedding pinaagi sa buhatan ni konsehal Leah Japson, walo ka mga pari ang mi-officiate sa maong kaminyuon.
Human sa seremonyas milahos gilayon ang bag-ong gipangkasal ngadto sa University of Cebu (UC) Mambaling alang sa reception nga giandam ug gigastuhan sa dakbayan.
Una nang gipadayag ni Japson nga tumong niini mao ang paghimong legal sa mga naghinigugmaay nga taud-taud nang nag-live in.
Kini aron pormal nang mabug-os sa ilang panag-ipon, ug labaw sa tanan, makakuha og bendisyon sa ilang kaugalingon nga pagpuyo.
Ang konsehal maoy chairperson sa Committee on Family and Women sa City Council nagkanayon nga tinuig kining kalihukan sa dakbayan alang sa mga molupyo sa siyudad nga nag-ipon sulod o kapin na sa lima ka tuig.(Elly Bolonos) BANAT NEWS