5-anyos nga babaye nalumos sa pasong

CEBU, Philippines - Wala na matabang sa amahan ang iyang kinamagulangang anak nga babaye human kini nalumos sa pasong nga nahimutang sa ilang panimalay sa sitio Mawamawan barangay Bonbon pasado alas 10 sa buntag sa miaging adlaw.

Si Rowerica Jay Manayaga, 5-anyos, nakit-an nalang sa iyang amahan nga si Roldan nga naglutaw-lutaw sa pasong ug patay na.

Matud pa sa amahan nga si Roldan ngadto sa kapolisan wala nila mabantayi ang bata nga mikanaog ug miadto sa pasong sanglit nangatulog pa sila nianang mga orasa.

Dihang namangon na sila gikan sa pangatulog nabantayan nalang nilang wala na diha ang bata sa ilang tupad maong ilaha kining gipangita.

Si Roldan   misusi sa maong pasong ug mao nalay iyang kakurat nga naglutaw-lutaw ug nagkulob na ang bata diha sa maong pasong ug wala nay kinabuhi, gisuwayan pa unta niya kini og tabang apan wala na gyud kini kinabuhi.

Matud pa ni SPO4 Alex Dacua sa Cebu City Police Office, Homicide Section sa pakighinabi sa Banat News nga ilang pagduda nga nagduwa-duwa ang bata dapit sa pasong ug aksidenteng natuwad   sanglit di makamaong molangoy hinungdan nga kini nalumos.

Sumala pang Dacua nga danglog kaayo ang kilid sa pasong ug maoy gituohang nakaingon nga nadakin-as kini diha sa pasong nga may tubig nga duha ka tiil.

Diin walay bisan usa ang nakasaksi sa pagkalumos sa bata tungod kay lagyo ang kabalayan sa ilang mga silingan sa maong dapit.

Ang mga ginikanan sa bata igo nalang mitaho sa nahitabo sa ilang anak ngadto sa kapolisan. – BANAT NEWS