Engkuwentro sa polis ug pugante

CEBU, Philippines - Puganteng dugay nang gipangita nakigpinusilay sa mga sakop sa Provincial Mobile Group (PMG) sa Cebu Provincial Police Office (CPPO) kritikal ang kahimtang sa Barili District Hospital.

Ang maong pugante nailang si Jury Tobis, nga dunay tulo ka mga warrants of arrest sa kasong murder ingon man frustrated murder ug naka-eskapo sa Ronda Police Station niadtong Hunyo ning tuiga.

Si Tobis napusilan sa mga sakop sa PMG pinanguluhan ni Insp. Roland Aliser nga maoy gitahasang modakop kaniya kagahapon sa alas 12:00 pasado sa kaadlawon sa barangay Bulyogon sa   lungsod sa Dumanjug.

Si Insp. Roland Aliser nga maoy nangulo sa operasyon nga gikahinabi sa Banat News nagkanayon nga usa ka bulan na nilang gisundan ang grupo ni Tobis diha sa lugar.

Giingong nakadawat sila og impormasyon nga gikatakdang mosibat paingon sa Negros ang grupo hinungdan nga kagahapon sa gabii usa ka team sa PMG ang naniid sa nahisgutang barangay apan kalit nga mibundak ang uwan.

Ang grupo sa mga suspetsado nanganaog gikan sa bukid agi sa gamay'ng dalan ug nagdala’g flashlights apan aksidente nilang naiwagan ang naghupo-hupong mga polis ug daling nanagan.

Dihang gisinggitan nga pahunongon kalit girakrakan sa grupo ang mga polis hinungdan nga gibawsan sila’g pabuto ug nisunod ang sinukliay sa bala sa duha ka habig.

Gumikan sa kangitngit ug pagbunok sa uwan nakahigayon pag-eskapo ang grupo, ang kapolisan wala dayon mopalayo sa dapit ug nag-atang sa dalan ug gipara ang matag sakyanang moagi.

Pipila ka minutos usa ka kolor pulang motorsiklong may sakay nga tulo ka tawo ang miagi apan dihang ilang gisitar mipasirit kini sa pagpadagan.

 Nianang pagka-alas 11:00 sa buntag kagahapong adlawa usa sa mga police informants ang mipahibalong dunay lalaking gikatahong samaran nga nagpatambal sa Barili District Hospital.

Dihang ilang gisusi ang tambalanan nagpaila ang maong lalaki ngadto sa mga doktor nga siya si Francis Perater nga misuway paghikog apan nasalbar ug gihatod sa wala mailhing mga lalaki.

Apan dihang ilang personal nga gisusi ang pasyente nasutang mao kini si Tobis base sa dagway sa picture niini diha sa warrant of arrest hinungdan nga kini gidakop.

Atol ning pagsulat sa balita, si Tobis nga may usa ka samad pinusilan sa kuto-kuto kasamtangan pang giatiman sa maong tambalanan ug nagpaabot pa sa mga kabanay aron ibalhin og tambalanan. – BANAT NEWS