CEBU, Philippines - Nalandig sa tambalanan ang usa ka 76-anyos nga lolo human kini tigbasa sa iyang silingan didto sa barangay Jaclupan, dakbayan sa Talisay, niadtong Lunes sa hapon.
Ang biktima mao si Paulino Abatayo, nga taga Jaclupan samtang ang suspetsado mao si Isabelo Bayking, 35, nga silingan ra sa biktima.
Sumala sa imbistigasyon sa kapolisan nasayran nga sa sayo pa gikontrata ni Abatayo si Bayking mga mohinlo sa iyang uma ubos sa sabot nga suholan niya kini og P200 .
Apan giingong wala tiwasa ni Bayking og hinlo ang uma ni Abatayo kay mikuyog kini sa nangompra niyang asawa hinungdan nga ang biktima nalay mitiwas sa paghinlo sa iyang uma.
Dihang namauli na ang magtiayon gikan nga nangompra miagi kini diha sa uma ni Abatayo busa gisudyaan kini sa biktima.
Apan misangpot sa init nga panaglalis tali sa biktima ug sa suspetsado ang maong pagpanukmat ug dihang nahutdan na og katarungan ang naulahi, milanit kini sa iyang sundang ug dayon gihabas ang ulo ug ang nagkalainlaing bahin sa lawas sa biktima.
Padayon pang gipangita sa kapolisan ang suspetsado. - Brenda D. Batuto (BANAT NEWS)