CEBU, Philippines - Usa ka 18-anyos nga suspek sa pagpusil ug pag-carnap og motorsiklo nasikop sa mga tanod ug opisyal sa barangay sa Candulawan dakbayan sa Talisay niadtong Huwebes sa gabii.
Ang suspetsado mao si John Raymond Toreon nga taga Candulawan kinsa nasakpan usab nga nagtangkil og .38 kalibre nga revolver nga may duha ka buhing bala.
Si Kapitan Josefina Conceal uban sa mga konsehal sa barangay nga sila si Necasio Abendan ug Adolfo Toregoza mibutyag sa Banat News kagahapon nga sa wala pa masikop si Toreon nagpahigayon sila og roving sa palibot sa ilang barangay ilabi na diha sa eskwelahan.
Matud ni Conceal nga may mitaho kanila kalabot sa usa ka tawo nga nagbarog-barog sa ngitngit nga bahin sa dalan nga nakapabalaka kanila.
Dihang gisusi nila ang maong tawo buot unta kining mosibat apan ilang gipahunong ug didto nasuta nga may gitangkil kining armas de fuego.
Matud pa ni Conceal nga si Toreon miangkon ngadto kanila nga siya’y mipusil sa usa ka security guard kinsa nag-sideline og drive og habal-habal nga nasabak sa dughan ug kilid sa miaging Hulyo unya dihang nahagba sa yuta ang biktima gisakiyo dayon sa suspetsado ang motorsiklo sa sikyu.
Apan ang maong motorsiklo nga SRM color blue nga nagtangag sa plakang 3015-GM na-recover ug naa karon sa kostudiya sa mga polis.
Si Toreon gikatakdang gipasakaan og kasong illegal possession of firearms diha sa piskaliya sa siyudad kagahapon. - Brenda D. Batuto (BANAT NEWS)