Alvin: wa ko mokobra og assistance

CEBU, Philippines - Hugtanong gipanghimakak ni kanhi   Mayor Alvin Garcia nga   mikobra ug midawat siya og financial assistance nga gihatag sa kagamhanan sa dakbayan ngadto sa mga senior citizens sa siyudad sa miaging pipila ka mga buwan.

Ang City government mitunol og tag P2 mil nga hinabang pinansyal sa mga senior citizens agi og pagtuman sa campaign promise ni Mayor Tomas Osmeña sa miaging eleksyon.

Gibutyag sa mayor nga lakip sa nisumiter og mga rekisitos alang sa nahisgutang financial assistance mao ang iyang higpit nga karibal sa politika nga si Garcia.

“Alvin Garcia availed the two thousand pesos for senior citizens, ni-comply siya, nidawat siya,” nagkanayon si Osmeña.

Butang usab nga kusganong gipanghimakak sa kanhi mayor tungod kay siya giingong wala makadawat sa maong financial assistance.

“Unsaon man nako nang dos mil, nabuang sila, pangutan-a sila kung nakadawat ba si Alvin, naa ba didto akong pirma?” sumala ni Garcia.

Nagtuo hinuon ang kanhi mayor nga dunay ni-process sa iyang mga dokumento alang sa pagpahimulos sa maong benipisyo.

Apan gitataw ni Garcia nga wala maabot sa iyang mga kamot ang kwarta ug labaw nang siya wala makakita kung cash o tseke ba ang gihatag sa City Hall.

Ang kagamhanan sa dakbayan nagplano na usab sa paghatag og dugang P2 mil nga financial assistance ngadto sa mga senior citizens sa dakbayan.

Kini gisaad ni Osmeña nga ma-release sulod niining tuiga, tungod kay giingong duna nay igong pundo ang City government.

Gipadayag na hinoon ni Garcia nga siya walay plano nga mopahimulos niini ug kini iyang ipalabi ngadto sa labaw’ng nanginahanglan nga mga senior citizen.

Ang City government nigasto og P50 milyones alang sa nahisgutang financial assistance ug susamang gahin usab ang igahin niini alang sa dugang hinabang pinansyal. - Elly Bolonos (BANAT NEWS)