Babaye nasikop sa buy-bust

CEBU, Philippines - Gidakop sa kapolisan ang usa ka babaye human masakpi sa akto nga nagbaligya og shabu ngadto sa usa ka police decoy ug nakaeskapo usab ang kauban niining lalaki atol sa buy-bust operation nga ilang gihimo sa sitio Ibabao sa barangay Agus, dakbayan sa Lapulapu.

Ang nadakpan mao si Lilibeth Ezpra, 39, samtang ang nakaeskapo mao si Randy Igot, nagpuyo sa maong dapit.

Si SPO2 Rex Cabrera ug mga kauban sa operation section sa kapolisan sa maong dakbayan maoy naghimo og buy-bust operation nga miresulta usab sa pagkasakmit sa tulo ka paketeng shabu gikan sa maong babaye.

Si SPO3 Danilo Tampus nga nahinabi sa Banat News miingon nga ang buy-bust operation natigayon human makadawat og kumpirmasyong namaligya si Ezpra og shabu sa maong dapit.

Si Ezpra nga gibalhog na karon sa sulod sa selda sa ilang bilanggoan ug gihikay na usab ang kaso nga kalapasan sa Akta Republika 9165 kon Comprehensive Dangerous Act of 2002. – BANAT NEWS