Mayor sa Alegria mipasangil nga gisabotahe sa bise mayor, konsehales

CEBU, Philippines - Modangop sa Department of Interior and Local Government (DILG)-7 ang mayor sa lungsod sa Alegria nga si Mayor Raul Guisadio aron iyang ireklamo ang gihulagway niyang pagsabotahe sa iyang bise mayor ug pipila ka konsehal aron dili mapasar ang budget sa lungsod.

Si Guisadio nasagmuyo sa giingong paglangay ni Bise Mayor Gilberto Magallon ug asawa niining konsehal nga si Berna Magallon, konsehal Albert Alocillo ug konsehal Mariano Miñez nga mapasar ang supplemental budget nianang sesyona.

Tumong unta sa maong sesyon ang pagpasar ug pag-aprubar sa P2.8 milyones nga budget sa nahisgutang lungsod.

Sa nasayran niadtong Miyerkules atol sa gipahigayong sesyon sa konseho wala gihapon mapasar ang budget human giingong gisabotan sa bise mayor ug pipila ka mga konsehal nga kaalyado niini nga di motungha.

Nunot niini gikasurpresa og dako sa mayor ang maong nahitabo sa milabay’ng sesyon tungod kay niadto pang buwan sa Hulyo giduso sa konseho ang maong proposed supplemental budget.

Ang P2.8 milyones nga supplemental budget number 3 nagsukip kini sa mga batakang serbisyo ingon man cultural activities, tourism ug uban pa.

Si Municipal planning officer nga si Tito Cavalida mipadayag nga apektado gyud ang operasyon sa lungsod tungod kay natanggong ang mga proyekto nga masukip sa maong budget.

Gihulagway ni Cabalida nga pamolitika lang ang gihimo sa kampo sa bise mayor sanglit nagplano man kini nga magpapili pagka mayor karung sunod tuig nga eleksyon. – BANAT NEWS