Hustong pamatasan atubangan sa news sources kinahanglan sundon

CEBU, Philippines - Mga mediamen ug mga tinun-ang buot mosulod sa maong propesyon gipahinumduman sa hustong pamatasan pakig-atubang sa news sources ug kung unsay ilang gikinahanglanon.

Kagahapon gilusad ang forum kabahin niini subay sa pagsaulog sa Press Freedom Week kagahapon sa buntag diha sa Marcelo B. Fernan Press Center sa sitio Sudlon, barangay Lahug dakbayan sa Sugbo.

Ang mga imbitadong mamumulong mao sila si Marichu Villanueva, Associate Editor sa Philippine Star; Christina Mendez, nga usa ka Senate Reporter sa Philippine Star; Jun Tagalog, Station Manager sa DYLA ug Basti Lacson sa Aboitiz Equity Ventures.

Lakip sa mitambong si Sir Miguel Belmonte, presidente sa Philippine Star Group of Publications. Ang maong kalihukan   gitambongan sa mga estudyante sa Journalism ug Mass Communication sa nagkadaiyang unibersidad sa Sugbu.

Si Jerry Tundag, editor-in-chief sa The Freeman mipaambit sa iyang kasinatian dihang usa pa siya ka reporter nga diin nagpahibalo kabahin sa pagpataka og publikar og litrato.

Samtang si Villanueva miingon nga kinahanglan sa usa ka reporter nga andam nang daan sa iyang ipangutana ug mga ekipong gikinahanglan, kinahanglan usab nga masinabtanon ang tigbalita sa tinubdan kung mohangyo kining di ipabutyag ang ubang sensitibong impormasyon aron sa ingon mosalig ang news sources kanila. Ang The Freeman ug Banat News nga ubos sa Philippine Star Group of Publications ug Aboitiz Equity Ventures maoy sponsor sa kagahapon nga forum. – BANAT NEWS