Mga monghe walay financial report: Artsidyosesis

CEBU, Philippines - Ang Artsidyosesis sa Sugbo mitug-an nga ang Marian Monks of the Eucharistic Adoration sa Lindogon, Sibonga wala gihapon makahatag og financial report bisan kapin na sa 10 ka tuig nga nagdumala sa Our Lady of the Holy Eucharist Shrine.

Si Arsobispo Ricardo Cardinal Vidal miangkon nga sukad sa pagkatukod sa shrine, ang mga Marian Monks wala pa gyud makahatag og report sa iyang buhatan.

Si Vidal nagkanayon nga ang maong shrine ubos pa gihapon sa hurisdiksyon sa Artsidyosesis hinungdan nga ubos sa lokal nga Simbahan ang superbisyon.

Giklaro sa Cardinal nga segun sa lagda sa Simbahan Katoliko nga kinahanglan nga adunay financial report nga mahatod sa Artsidyosesis matag tuig.

Apan ang rekord sa buhatan sa Cardinal, ang mga Marian Monks napakyas sa paghimo sa ilang obligasyon.

Wala hinuon maklaro niini kun ang Artsidyosesis nakahatag ba usab og pahinumdum ngadto sa nagdumala sa shrine aron makatuman kini sa gipangayong financial report.

Nasayran nga usa ka Frater Paul Mary nga nailang si Venancio Cabillon mibulgar nga gawas sa sex scandal ug korupsiyon sa mga monghe sa Lindogon. Matud niya nga moabot og minilyon ka pesos ang nahipos niining donasyon ug gikan sa hinatag sa nag-petisyon nga debotos.

Ang maong alegasyon mao na karon ang nahimong sentro sa gipahimo ni Vidal nga imbestigasyon nga iyang gimando niadtong adlaw nga Martes. – BANAT NEWS