Mediaman ug pamilya gi-harass diha sa SRP mokiha

CEBU, Philippines - Usa ka sakop sa media midangop sa kapolisan human kini ug iyang pamilya gi-harass sa tulo ka wala mailhing mga lalaking luwan sa usa ka pick-up niadtong Lunes sa alas 8 sa gabii diha sa crossing sa South Coastal Road ug San Isidro Road, barangay San Isidro, dakbayan sa Talisay.

Ang biktimang si John Rey Saavedra, 33, taga barangay Pakigne, lungsod sa Minglanilla ug acting editor-in chief sa Banat News uban sa iyang asawa ug mga anak mitaho ngadto sa Talisay City Police Station kabahin sa maong hitabo.

Ang pamilya gikan pa nanuroy sa dakbayan sa Sugbo ug padulong nang mopauli luwan sa ilang family Scrum van sa dihang pagliko gikan sa M. J. Cuenco paingon sa M.C. Briones, deriyot masirad-i ni Saavedra ang pick-up nga walay headlight.

Ang Mitsubishi Estrada pickup kolor marine blue nga nagtangag og plakang GLH-823 nga may sakay nga mga lalaki ug babaye migukod sa Scrum van ni Saavedra ug miaksyon og saghid sa tuong bahin pag-abot sa taytayan dayong sulod sa South Coastal Road duol sa Veco, dayong pasirit og dagan.

Tungod niini deriyot mawad-i og kontrol sa manobela si Saavedra hinungdan nga iya kining gigukod aron pagkuha sa plate number, ug pag-abot diha sa nahisgutang crossing naabtan nila kini tungod kay stop ang traffic lights.

Diha-diha giingong nanganaog ang mga lalaki sa luyo sa pickup ug mibuhi og mga pulong sa pag-ingon ngadto kang Saavedra “hambugero ka, ga-una-una ka’g f__k you!”

Wala pa gyud matagbaw, giingong giablihan sa mga lalaki ang pultahan sa kilid ni Saavedra ug gisuwayan kini pagbunlot pagawas sa multicab ug mihagad kaniya og sukmagay, samtang ang ubang mga kauban gipatid-patiran ang sakyanan sa editor.

Ang asawa ni Saavedra ug mga anak nga nag-edad og 10-anyos, 6-anyos, 5-anyos ug 2-anyos nakugang sa hitabo ug nangalisang sa mga lalaking mibunlot sa ilang amahan ug mipatid-patid sa ilang sakyanan.

Tungod sa kahadlok nga maamong ang iyang pamilya daling gipadagan ni Saavedra ang multicab ug midiretso sa police station ug misumbong sa hitabo.

Ang maong sakyanan dihang gisusi sa buhatan ni Land Transportation Office-7 regional director Raul Aguilus giingong narehistro sa pangalan sa usa ka Mayet Nacario O’Connel, residente sa Zone 2-019 Fidel Bas Street, barangay Mohon, Talisay.

Si Saavedra mihimakak nga iyang gibuhatan sa ingon ang grupo kun dili iya kining gitudlo agi og reaksyon sa kalit nilang paghadyong sa sakyanan ug ang wala nila gani pagtagad sa ilang gihimo ug nagpunay lang og pangatawa diha sa pickup.

“Nasuko to nga hapit nako masirad-i. Di man makit-an kay wala mag-headlight. Alas otso pa gyung dako. Sila naman hinuoy bayolente,” matud pa niini.

Ang kapolisan mopahigayon og follow-up nga imbestigasyon sa insidente samtang si Saavedra mibahad nga mopasaka og kaso diha sa LTO alang sa administratiba ug kasong kriminal ngadto sa korte batok sa tag-iya sa nahisgutang sakyanan ug sa mga lalaking mihimo niini sa iyang pamilya.  - Brenda Batuto (BANAT NEWS)