Traffic violations mikunhod

CEBU, Philippines - Gibutyag ni Atty. Raul Aguilus, regional director sa Land Transportation Office-7 nga mikunhod karung tuiga ang nakalapas sa lagda sa trapiko nga mga drivers ilabina sa publikong sakyanan itandi sa ubang lugar dinhi sa Central Visayas.

Matud ni Aguilus sa 888 News forum kagahapon diha sa Waterfront Hotel sa Lahug ning dakbayan nga ang pagkunhod iyang gituohang gumikan sa pagpataas na sa multa sa mga kalapasan sa lagda sa trapiko.

 Giangkon niya nga bisan tuod og hugot kining gisupak sa mga drivers ug operators apan dako gyud kini epekto ngadto sa mga drivers sa PUJ ug sa motorista kay nagpasabot kini nga nahadlok sa multahan.

Ang LTO-7 mipatuman sa taas nga multahan sayo niining tuiga, sama sa violation of traffic signs diin pamultahon og P1,250 imbes P200 lang, ang expired nga prangkisa may multang P6 mil gikan sa naandang P1,500.

Niangkon siya nga labihang kataas ra gyud sa multahan sa mga drivers ilabina sa PUV apan alang niya nga kaayohan ra kini sa tanan ug epektibong pamaagi nga magmatngon na ang mga drivers.

Nagkanayon si Aguilus nga niminus na usab ang aksidente sa kadalanan nga naglambigit sa mga minibuses human sa subsob nilang gihimo nga surprise random drug test sa mga drivers diin diha nila himuon sa kadalanan. Nibutyag si Aguilus nga nakakumpiskar sila og 25 ka lisensya diin ang mga tag-iyang driver napositibo nga tiggamitan og shabu ug marijuana.

“They must have the value of responsibility,” matud pang Aguilus kinsa nidugang nga mopahigayon usab sila og road safety seminars, re-orientation sa road safety rules ug paglusad og volunteers alang sa road safety aron makatabang pag-promote sa seguridad sa kadalanan.  - Rey Pasaporte (BANAT NEWS)