Gibunalan, giluba namatay

CEBU, Philippines - Patay ang usa ka construction worker nga lalaki human gitabangan og bunal pagkahuman gidunggab samtang nagsayaw sulod sa diskohan sa barangay Sambag lungsod sa Tabogon kagahapon sa alas 2:30 sa kaadlawon.

Ang biktima nga patay nang nadangat sa tambalanan mao si Marianito Labidon alyas Titing, 49, molupyo sa nahisgutang lugar samtang ang duha ka mga suspek mao sila si Jojo Lambohon, nga piyansado sa kasong frustrated murder ug Roland Pepito, pulos molupyo sa barangay San Vicente sakop sa maong lungsod.

Matud pa ni SPO4 Anecito Manloloyo ang deputy chief sa Tabogon Police dihang nahinabi sa Banat News subay sa ilang imbestigasyon gikan sa mga saksi nagsayaw ang biktima sulod sa diskohan.

Kalit lang gitabangan og bunal gamit ang kahoy sa duha ka mga suspek ug sa pagkatumba niini gidunggab dayun kini ni Jojo makaduha ka higayon sentro sa dughan.

Nagkatibuwaag og panagan ang mga tawo nga diha sa sulod niadtong higayuna ug pagkahuman nag-iyahay og sibat ang mga suspek ug gidala sa Verallo District Hospital sa lungsod sa Bogo apan gideklarar kining dead on arrival sa mga doktor.

Hinuon atol sa gipahigayong hot pursuit operation sa kapulisan nadakpan ang suspek nga si Pepito pipila ka oras human sa hitabo sa pinuy-anan niini sa barangay San Vicente ug gibalhog na sa detention cell samtang nagpaabot sa tukmang kaso nga ipasaka.

Sentro sa gitutukan sa nagpadayong imbestigasyon sa kapulisan nga posibleng dunay personal nga panagbingkil ang biktima ug mga suspek nga nagkaabot sa diskohan niadtong higayuna.  - Darrel Carumba (BANAT NEWS)