'Cardinal dunay obligasyon pagsusi'

CEBU, Philippines - Giklaro ni Atty. Marcelo Bacalso, usa sa mga Catholic Faith Defenders, nga si Arsobispo Ricardo Cardinal Vidal adunay responsibilidad sa paghimo og kinaugalingon nga pakisusi sa kontrobersiya batok sa Marian Monks of the Eucharistic Adoration nga nagdumala sa Our Lady of the Holy Eucharist Shrine sa Lindogon, Sibonga.

Matud pa ni Bacalso nga subay sa Canon Law, si Cardinal Vidal obligado nga mohimo og pakisusi bisan wala'y nadawat nga reklamo.

Kini aron matin-aw ang kamatuoran sa maong alegasyon ilabi na kun maglambigit kini sa kalihukan sa simbahan. “Base sa Canon 392: Since the archdiocesan bishop must depend the unity of the universal church, he is bound to foster the discipline which is common to the church, and so press the observance and of all ecclesiastical laws, he is to insure that abuses do not greet into ecclesiastical discipline, especially concerning the ministry of the Word, the celebration of the Sacraments and the Sacramental and the worship of the God, and the Code of Saints and the administration of rules,” matud ni Bacalso. “Naa diha ang pagkakinahanglan nga himuon ang pagsusi dili pag-imbestigar kay wala man kaha'y pormal complaint. Apan ang pagsusi gikinahanglan.”

Apan si Msgr. Esteban Binghay, episcopal vicar sa Artsidyosesis sa Sugbo nagkanayon nga mahimong mopahigayon og pakisusi o imbestigasyon si Cardinal Vidal kun adunay panginahanglanon.

“Pero kun adunay panginahanglan tungod kay saba kaayo ang mga tawo, tingale ex-officio mapahigayon gyud ang imbestigasyon aron makuha ang kamatuoran ug aron maabagan ang tanang mga sektor, ang mga monghe ug ang nangreklamo,” sumala pa ni Binghay.

Dugang pa ni Binghay nga mas maayo gyud nga may reklamo nga madawat ang Cardinal aron mahibaw-an ang sukaranan sa pakisusi ilabi na nga usa na ka sibilyan ang reklamante. (BANATNEWS)