P3-milyones gitanyag sa monghe

CEBU, Philippines - Ang doktor sa mga “monghe” nga nagdumala sa Our Lady of the Holy Eucharist sa Upper Lindogon, lungsod sa Sibonga nga kaubang mibutyag sa eskandalo ug anomaliya sa shrine, mibutyag nga ang abogado ni Arsobispo Ricardo Cardinal Vidal miduol sa kanhi nila abogado ug mitanyag og P3 milyones aron mohilom ug dili na lang padak-on ang isyu.

Si Dr. Edwin Fonghe nagkanayon nga si Atty. Joel Ouano midangop sa ilang kanhi abogado nga si Atty. Michael Gatchalian ug misuway og tanyag og P3 milyones aron i-atras ang kaso ug magpakahilom na lang. Matud ni Fonghe nga mitanyag ang kampo ni Cardinal Vidal ug Fra. Martin nga adto sa Cebu City Sports Club sila magkita aron ihatag ang kantidad. Apan giklaro sa doktor nga gibalibaran niya kini gumikan kay buot nila nga sa legal nga paagi mahatagan og husay, kasulbaran ug hustisya ang gibati ni Fra. Paul.

"Kung kinsa ang nasayop maoy moduol ngadto sa ilang nasaypan ug dili ang nabiktima maoy moduol sa mga tawo nga nakasala ngadto kanila,” sumala pa ni Fonghe, kinsa miingon nga dili na usab sila makigkita sa Arsobispo. Samtang ang gipalagpot sa Marian Monks of the Eucharistic Adoration nga si Frater Paul Mary o Jovencio Cabillon miingon wala na sila'y pagsalig ngadto kang Vidal.

Si Fra. Paul maoy kanhi monghe nga mibutyag sa mga eskandalo ug anomaliya sa Shrine. Matud ni Fra. Paul nga dili na siya moduol kang Vidal aron itug-an ang mga kontrobersiya sa kanhi kauban niyang mga monghe tungod kay misulay na siya og duol sa Arsobispo niadtong Sityembre 8 pinaagi ni Fr. Cosme dela Peña sa Ronda Parish. Niadtong adlawa gisaulog ang adlaw’ng natawhan ni Birhen Maria.

Tumong unta ni Fra. Paul nga mahilot ang kasungian tali niya ug ni Fra. Martin Mary o Martin Mangila, apan wala siya dawata sa Cardinal.

Matud pa ni Fra. Paul nga hustisya ang buot niyang maangkon sa pagpakaulaw kaniya nga gipublikar sa pamantalaang "Lungsuranon" ang pagpalagpot kaniya gikan sa mga Marian Monks, diin siya gibutangbutangan nga usa ka trafficker sa ilang organisasyon ug gidudahang nanguwarta pinaagi sa pagpang-solicit sa mga parokyano. Sumala pa niya nga ang tanan walay kamatuoran.

Ang katuyoan ni Fra. Paul nga mahilayo sa matud pa niya "impernong dapit" gumikan sa iyang nasinatian isip sakop sa pundok sa mga “monghe” sa Lindogon nga dugang pa niya “giunay og lamoy sa pakighilawas sa iyang labaw.”

Kahinumduman nga si Vidal mipadayag ngadto sa Media nga walay mahimong imbestigasyon kun dili siya makadawat og pormal nga reklamo gikan ni Fra. Paul batok sa iyang mga kanhi kauban sa MMEA ug ang pagpagya sa mga anomaliya sa mga monghe sulod sa monasteryo sa Lindogon. Si Msgr. Achilles Dakay, ang tigpamaba sa Artsidyosesis sa Sugbo, gisulayan sa pagtawag sa Banat News aron kuhaan og reaksiyon kalabot sa tanyag nga P3 milyones, apan “cannot be reached” ang cellphone niini.   (BANATNEWS)