CEBU, Philippines - Gitandi sa chairman sa Bayan Central Visayas nga si Jaime Paglinawan nga susama og walay kalainan ang administrasyon ni Presidente Gloria Macapagal Arroyo sa kanhi rehiming Ferdinand Marcos atol sa ilang gipahigayong lihok protesta kagahapon agi’g paghandum sa Martial Law 37 na katuig ang nakalabay.
Nagsugod ang kalihokan sa mga sakop sa militante diha sa Fuente Osmeña Oval pasado alas 8:00 sa buntag dayon nagmartsa paingon sa dalan Colon diin gipahigayon nila ang mubo nga programa.
Si Paglinawan mibutyag sa Banat News nga mikabat sila og 300 ka mga nanagduyog sa maong lihok protesta nga naglakip sa mga sakop sa Bayan Muna, Panaghugpong Kadamay, Kilusang Magbubukid ng Pilipinas (KMP) Panama Sugbu fisherfolks, Amihan, Anakbayan ug Cebu City United Vendors Association.
Matud ni Paglinawan nga padayon silang nangayo og hustisya sa ilang mga kauban nga gipamatay panahon sa Martial Law nga hangtud karon wala pa gyud kahatagi og hustisya ang tanang pamilya niini.
Gani midugang siya nga base sa ilang record sa mga dokumentadong kaso, kapin sa usa ka libo ka mga sakop sa militante ang gipamatay sulod sa 20 katuig nga pagdumala ni Marcos ug 759 niini ang gipanagit ug gituohan nila nga gipamatay na usab kini.
Nunot niini, ila usab nga gipangayo ang hustisya sa administrasyong Arroyo tungod kay sulod sa siyam ka tuig nga paglingkod niya sa pagka presidente mikabat na og 1023 ang biktima sa inhustisya, ug 207 niini gipanagit.
Gihulagway ni Paglinawan nga walay kalainan sa rehiming Marcos ang kasamtangang administrasyon ni Arroyo tungod sa nagpadayon nga pangabuso ug mas mi-grabi pa ang pagyatak sa tawhanong katungod.
Matud niya nga dili sila mohunong sa pagpangita og hustisya sa tanang nabiktima panahon sa Martial Law sanglit alang niya wala pa gyud makalingkawas sa hingpit ang katawhang Pilipinhon sa susamang dektadoryang sistema nga gipatuman sa administrasyong Arroyo.
Siya nitataw nga duna sila’y pagduda karon nga nangita lang sa hustong panahon si Arroyo aron iyang ideklarar ang Martial Law, kay aron magpabilin siya sa gahom. (BANATNEWS)