Hepe, upat ka sakop imbestigahon pagbiya sa pwesto

CEBU, Philippines - Gikatakdang apil sa ipaubos sa imbestigasiyon ang hepe sa kapulisan sa lungsod sa Alcoy Insp. Wilfredo Tautohan ingon man ang upat ka mga sakop niini gumikan sa nahitabo niadtong Domingo sa hapon nga ang piniriso ang nakatubag sa tawag sa telepono ug dili mga polis.

Usa ka tigbalita ning pamantalaan ang nanawag sa maong police station aron pagsusi sa mga panghitabo didto nianang adlawa apan nakurat nalang ang tigbalita nga usa ka inmate ang nakatubag kay giingong miresponde og alarma ang mga polis.

Ang hepe sa kapulisan sa probinsiya sa Sugbo Sr. Supt. Jesus Gaquing miawhag sa maong reporter paghatag og pamahayag kabahin niini ngadto sa Provincial Intelligence Branch (PIB) aron maoy basehan pagsugod sa pormal nga imbestigasyon.

Gibutyag ni Gaquing nga ang hepe sa kapulisan sa Alcoy Insp. Wilfredo Tautohan ingon man ang upat ka mga sakop niining maoy duty niadtong higayuna maoy ipaubos sa imbestigasyon.

Gihulagway ni Gaquing nga usa ka dakung kalapasan kun mapamatud-an ang maong pasangil nga pagbiya sa polis sa ilang buhatan nga walay gibilin bisan usa samtang nagtubag og alarma ug gitugyan lang sa usa ka piniriso ang pagbantay sa maong estasyonan.

Hinuon si Gaquing una nang mibutyag nga usa ka polis nga gihinganlan og PO2 Balmore ang nakatubag niya dihang iyahang gitawgan ang Alcoy Police Station niadtong Domingo sa hapon human napahibawo sa reporter nga walay police nga nag-duty sa maong buhatan kay priso ang nakatubag.

Mihimakak usab ang maong polis nga mibiya siya sa iyang pwesto ug priso maoy nakatubag sa telepono, ang Banat News duha ka higayon mitawag sa maong police station nianang adlawa ug mao ra gihapong piniriso ang nakatubag niini nga nagpailang si Victor Gimenez, 70, nga nakapatay og silingan niadtong Biyernes tungod sa iyang pagdudang kini maoy mikawat sa iyang manok, si Gimenez nangangkong mogawasay na siya kagahapong adlawa kay nakig-areglo na siya sa kabanay sa biktimang si Rudy Cabellon,58.

Ang hepe sa PIB Insp. Ruben Cuizon maoy gitahasan ni Gaquing nga modumala sa himoong imbestigasyon sa kapulisan sa Alcoy. (Darrel Carumba)   (BANATNEWS)