Drayber 'gikulata' sa traffic enforcer

CEBU, Philippines - Mireklamo sa kapolisan sa Presinto 1 sa Centro Police Station ang usa ka lalaki batok sa usa ka traffic enforcer nga mikulata kaniya ug mikuha sa iyang kuwartang P1,000 nga kinitaan sa pagpamasahero.

Si PO2 Arthur Cuyos miila sa biktima nga mao si Edgardo Mayor, 31, taga barangay Bahay, lungsod sa Sibonga ug drayber sa 21B nga jeepney.

Matud pa ni PO2 Cuyos giila sa biktima ang traffic enforcer sa Traffic Enforcement Agency of Mandaue (TEAM) mao si Virgilio Aleviado.

Si Domingo Cortes nga maoy media liaison officer sa TEAM nga nahinabi sa Banat News miingon nga gidakop si Mayor tungod sa pagpataka og parking ug pickup og pasahero sa dalan A.C. Cortes Avenue sa barangay Ibabao.

Dihang gipangitaan sa iyang lisensiya sa traffic enforcer nagdumili kini sa paghatag ug gibalikas pa ang traffic enforcer ug ginganlan pa niya og buang dayong pabulhot og padagan pahilayo sa maong lugar.

Tungod niini nahitabo ang ginukdanay hangtod nga naabtan kini sa barangay Mabolo sa Cebu City nila ni Danilo Pogoy ug Eugene Cabatingan kinsa maoy nagdala kaniya sa ilang buhatan.

Matud pa ni Cortes nga sa pagpaingon na sa ilang buhatan ang traffic enforcer nga si Aliviado nga nag-una kang Mayor kalit gihapak sa buko-buko sa drayber maong mibawos kini.

Gipanghimakak ni Cortes nga gikuhaan nila og P1,000 si Mayor sanglit igo lamang kini nilang gipabayad og P400 sa karaang kalapasan niini sa trapiko.

Si Cortes miingon nga natingala kaayo sila sa reklamo ni Mayor ngadto sa kapolisan sanglit nagpakiluoy pa man kini ngadto kanila nga dili ibalhog sa bilanggoan ug mobayad lamang sa iyang nahimong kalapasan. (Romeo Limpangog)   (BANATNEWS)