Presinto gibilin sa priso

CEBU, Philippines - Piniriso sa Alcoy Police Station maoy mitubag sa tawag sa telepono kagahapon sa hapon tungod kay ang mga polis giingong mitubag og alarma. Giingong duna untay usa ka polis ang nahibilin sa police station apan gikatahong natulog kini.

Ang nahisgutang piniriso nga gikahinabi sa Banat News sa telepono mao si Victor Gimenez, 70-anyos nga taga barangay Kampong Pasol, Alcoy nga nadetiner   sa police station tungod kay nakapatay   niadtong Biyernes.

Ang Banat News mitawag sa maong police station aron magsusi sa mga panghitabo sa maong lungsod apan ang maong piniriso maoy nakatubag niini duha ka higayon.

Si Gimenez mibutyag nga siya maoy suspek sa pagpatay kang Rudy Cabellon, 58, nga ilang silingan nga iyang gipasanginlang nangawat sa iyang mga manok ug sa iyang kalagot iya kining giluba.

Matud pang Gimenez nga naareglo ang iyang kaso sa pamilya sa biktima ug gikatakda na siyang buhian karong adlawa.

Wala hinuon siya mobutyag kinsa mihatag og pagtugot kaniyang motubag sa tawag sa telepono ug si kinsa maoy nag-release kaniya gikan sa karsel.

Dihang gipangutana kun asa ang mga polis diha sa Alcoy Police Station nganong siya maoy nakatubag sa telepono, kini mitubag nga pasado alas 3 sa hapon kagahapon dunay nadawat nga tawag sa alarma ang mga polis ug miresponde.

Sa dihang gitawgan og balik sa Banat News aron pagkonpirmar kun wala ba gyu'y polis sa maong police station, si Cabellon gihapon ang nakadawat sa maong tawag.

Niining tungura siya mibutyag nga dunay usa ka tawong wala niya mailhi nga diha sa sulod apan natulog ug nagsul-ob og t-shirt ug shorts, nagtuo siyang polis ang maong lalaki.

Si Sr. Supt. Jesus Gaquing, direktor sa Cebu Provincial Police Office dihang gikuhaan og pamahayag Banat News kabahin sa maong hitabo daling mitawag sa maong buhatan. Si Gaquing mibutyag nga ang nakatubag kaniya mao ang usa ka polis nga iyang giila lang sa pangalang Balmore apan kini nanghimakak nga may mitawag sa ilang buhatan.

“Nitawag ko didto ang nakatubag ang polis nga si Balmore, didto ra man kuno siya, ni-deny man siya,” matud pang Gaquing.

Giawhag hinuon ni Gaquing ang Banat News sa pagsumiter og pamahayag kabahin sa maong insidente sanglit gihulagway niyang kalapasan isip polis ang pagbiya sa ilang mga pwesto lakip na ang pagpagawas sa usa ka binilanggo sa wala pa ang adlaw nga kini gikatakdang buhian. Gipadayag ni Gaquing nga angayang maimbestigahan ang maong insidente aron madisiplina ang mga badlungon niyang mga sakop. – BANAT NEWS