CEBU, Philippines - Naglunang sa kaugalingong dugo ang usa ka lalaki human kini makaangkon og 18 ka samad dinunggaban sa nagkadaiyang parte sa lawas sa barangay Langin, lungsod sa Ronda pasado alas 6 sa hapon sa miaging adlaw.
Ang maong lalaki nga giingong adunay sakit sa utok gibanabana lang nga adunay pangidaron nga 25 ngadto 30-anyos ug adunay gitas-on nga 5’2’’. Nasayran nga ang biktima sa wala pa makit-ing patay gipangutana kini sa ubang molupyo sa maong lugar apan nagtungok lang kini ug wala motingog.
Apan pasado alas 12 sa udto naalarma ang mga molupyo sa nahigutang lugar tungod kay mao na lay ilang nakit-an ang patay’ng lawas sa biktima nga naglunang sa kaugalingong dugo.
Ang mga molupyo sa maong lugar daling nakapahibalo sa Argao Police Station apan gi-turn-over ra usab kini ngadto sa kapolisan sa Ronda.
Sa paghiling sa lawas sa biktima, nasuta nga adunay tulo ka hiniwaan sa liog nga bahin diin ang tika-tika niini hapit na maputol, samtang laing samad niini sa ilok ug sa wala nga bahin sa iyang tiyan. Matud pa ni PO2 Socrates Avila sa pakighinabi sa Banat News nga ila pa karun imbestigahan kun si kinsa ang biktima tungod kay walay bisan usa nga nakaila niini. Giangkon ni PO2 Avila nga daghan ang mga “bogoy” sa ilang lugar ug gipraktisan lang ang biktima. – BANAT NEWS