Chiz mosuporta ni Ace para gob

CEBU, Philippines - Suportahan ni Senador Francisco “Chiz” Escudero si Tourism Secretary Joseph “Ace” Durano kun modagan kini pagka-gobernador sa lalawigan sa Sugbo atbang ni Gobernador Gwendolyn Garcia. Sumala pa ni Durano nga adunay posibilidad nga modagan si Durano pagka-gobernador sa lalawigan. “Whatever position he will aspire, he has my full support,” si Escudero nagkanayon atol sa press conference niadtong miaging adlaw. Samtang wala gihimakak sa batan-ong senador nga taga Sorsogon ang taho nga aduna siya'y laraw pagpapili sa labing taas nga posisyon sa nasud sa 2010 nga eleksiyon. Nasayran nga ang Nationalist Peoples Coalition (NPC) naghunahuna karon sa pag-umol sa Chiz-Loren (Sen. Loren Legarda) tandem.

Apan wala ikonpirmar ni Escudero ang taho nga nilang duha ni Legarda, siya na ang himuong standard bearer.

Apan sa dihang gipangutana unsa nga posisyon iyang daganan, matud niini: “Kung tatakbo nga ako, eh di ‘yong mataas na. Libre naman ang mangarap.” Sa susamang kalambuan, wala ikahadlok sa kampo ni Garcia ang report nga mahimong dawaton ni Durano ang sugyot pagsakbang kaniya.

Si Garcia nagkanayon nga wala siya mabalaka kun si kinsa ang iyang makontra sa 2010 nga eleksiyon. Kini tungod kay pabilin niyang nakuha ang suporta sa halos tanang mga incumbent mayors ug kinabag-ang mga barangay kapitan. Matud pa ni Garcia nga wala pa siya'y nakitang politiko dinhi sa Sugbu nga mipakita og interes pagsakbang kaniya.

Ang gobernadora nagkanayon nga dugay ra siyang nangandam alang sa umaabot kampanya ilabi na sa mitumaw nga dagkong isyu sa Kapitolyo sama sa pagpalit sa Balili lot ug ang overpricing pagpatukod sa Cebu International Convention Center (CICC) nga padayon nga giimbestigar sa Ombudsman. – BANAT NEWS