Lapulapu piho nga mahimong distrito

CEBU, Philippines - Gitataw sa mga opisyal sa dakbayan sa Lapulapu nga sigurado nang mahimong distrito ang maong dakbayan.

Kini ang gibutyag ni Vice Mayor Mario Amores sa maong dakbayan kinsa nagkanayon nga sa dili pa matapos kining tuiga hayan nga lone district na ang Lapulapu.

Miingon si Amores nga gipamuwawan kining isyuha sa mga senador ug sulod sa duha ka adlaw nga debate, ug karon hayag kaayo ang kasigurohan nga mahimo nang distrito ang Lapulapu.

Gumikan niini mapasalamaton kaayo si Amores sa mga miyembro sa hunta probinsyal nga maoy misugyot sa paghimong usa ka distrito sa Lapulapu.

Matud pa ni Amores nga dako siya og pagtuo nga karong sunod semana ikadeklarar na nga usa na ka distrito ang Lapulapu.

Kun matuman kini, ikapito nang distrito ang Lapulapu sa tibuok lalawigan sa Sugbo.(Bong Soriano)