Gisaway

CEBU, Philippines - Gisaway ni kanhi senador Sonny Osmeña ang gikolektang 5 pesos nga terminal fee sa Kapitolyo ngadto sa mga pasaherong mosulod sa South Bus Terminal.

Sumala pa niini sa interview sa DyRF nga gisamutan og apiki ni Gov. Gwendolyn Garcia ang mga kabus nga mga trabahante nga taga habagatang bahin sa lalawigan sa Sugbu.

 Gihulagway niyang nagpakita lamang kini nga ang gobernador wala mihatag og gamay nga kaluoy ngadto sa mga kabos nga mga taga probinsiya ug mipahinumdom nga di basta makasayon-sayon sa pagpabayad ang Kapitolyo aron lang mabawi ang nagasto sa renovation sa South Bus terminal tungod kay kalapasan kini sa balaod ilabina og walay ordinansa gikan sa Hunta Probinsiyal.

Gitataw sa kanhi senador kun ipadayon kini sa gobernador hayan mosamot kadaghan ang kaso nga atubangon sa gobernadora ug posibleng mabalhog pa kini sa bilanggoan.

Apan gidepensahan sa general manager sa South Bus Terminal nga si Eva Encabo ang pagkolekta sa Kapitolyo sa terminal fee tungod kay gamay ra gani ang P5 kay gigastuhan gyud ug gihimong “world class” ang pasilidad alang sa hamugaway nga biyahe sa mga sumasakay.

Gisugdan ang pagpangolekta niadtong adlaw'ng Martes human sa inagurasyon sa gi-renovate nga bus terminal sa kagamhanan sa lalawigan sa Sugbu. (BANATNEWS)