Dengue cases sa lalawigan mi-doble - Provincial Health

CEBU, Philippines - Ang mga tinugyanan sa Provincial Health Office mipahibawong midoble ang gidaghanon sa kaso ug sa casualty sa dengue sa unang 15 ka adlaw sa bulan palang sa Septiyembre sa Probinsiya sa Sugbu.

Si Dr. Cathy Buscato, ang dengue coordinator sa Provincial Health Office nagkanayon nga nabalaka sila sa pagdoble sa natalang kaso sa dengue sa ilang buhatan nga niabot og kapin sa 800 ka kaso alang niining tuiga.

Matud pa ni Buscato nga niini lamang bulana unom na ang namatay sa maong sakit diin ang pinakabag-ong biktima gikan sa Bantayan samtang ang usa gikan sa lungsod sa Madridejos.

Sigon sa record, nag-una sa pinakadaghan og kaso mao gihapon ang lungsod sa Minglanilla, gisundan kini sa lungsod sa Naga, Bogo, Danao, San Fernando, San Remegio ug sa dakbayan sa Talisay.

Subay niini, ang mga ginsakpan sa Provincial Health Office mihimo og anti-dengue information campaign sa mga kabalayan sa mga kalungsuran nga dunay daghang kaso sa dengue aron makalikay ang mga lomulupyo sa maong sakit. (BANATNEWS)