Opisyal dismayado sa Inquiry sa "Big 3"

CEBU, Philippines - Dismayado si Konsehal Arsenio Pacaña sa resulta sa gipahigayong Congressional Inquiry pagtino sa hinungdan nganong mas mahal ang presyo sa mga produktong petrolyo dinhi sa Sugbu itandi sa ubang dapit sa Kabisay-an ug Mindanao.

Ang gipahigayong House Investigation nga gipahigayon niadtong miaging Huwebes dinhi sa siyudad gitambungan sa kadaghanan sa mga kongresista sa Sugbu.

Apan alang kang Pacaña walay klarong resulta ang gihimong pakisusi sa House Committee on Energy hinungdan nga kini iyang ipaabot sa ubang kongresista.

Usa ka resolusyon ang ipalabang sa konsehal atol sa umaabot nga sesyon sa City Council nga nag-awhag sa mga kongresista pagseryoso og tuki sa maong problema.

“Dili man gyud to definitive, dili conclusive ba, in aid of legislation man kuno tong ila pero ato ning ipaabot sa taas aron dunay pressure ba,” sumala ni Pacaña.

Ang konsehal lakip sa wala makauyon sa kataas sa presyo sa mga produktong petrolyo dinhi sa Sugbu itandi sa ubang mga dapit sa nasod.

Si Gobernador Gwendolyn Garcia maoy unang mikwestyon niini uban sa pagpasaka og reklamo batok sa tulo ka mga higanteng kompanya sa lana dinhi sa Pilipinas.

Nasayran hinuon nga wala pa mapasakai og tukmang kaso ang Shell, Petron ug Chevron subay sa giduso nga reklamo sa gobernador tungod kay giingong gipaabot pa sa DOE-DOJ task force ang transcript sa stenographic notes sa gipahigayong preliminary investigation. Butang nga wala usab magustuhi ni Pacaña hinungdan nga kini mihimo og lakang nga magsuporta sa tinguha ni Garcia. Gipadayag ni Pacaña nga mabaw ra ang rason sa mga representante sa tulo ka higanteng kompanya sa lana atol sa gipahigayong inquiry. (BANATNEWS)