Noynoy makigdayalogo

CEBU, Philippines - Andam makigtagbo ug makigdayalogo si Senador Benigno “Noynoy” Aquino ngadto kang Cebu Archbishop Ricardo Cardinal Vidal aron personal nga mapasabot ang iyang baruganan sa Reproductive Bill nga kusganong gisupak sa Simbahang Katoliko.

Kini mao usab ang hinungdan nga mihulgang mopa-blacklist ang simbahan sa mga kandidato unya sa pagka-presidente sa 2010 nga mosuporta sa maong balaudnon. Si Muntinglupa Rep. Raffy Biazon, usa sa suod ni Aquino sa interview sa DyRF mibutyag nga wala sila'y mahimo kun ang criteria sa simbahan naglangkob sa maong balaudnon.

Apan gipaniguro ni Biazon bukas sa usa ka dayalogo si Aquino sa mga leader sa simbahan ilabi na kang Cardinal Vidal aron mapasabot sa mga rason nganong misuporta sa birth control bill si Aquino.

Dili hinuon makasiguro si Biazon kun mausab ba ang baruganan ni Noynoy Aquino labot sa Reproductive Bill human unya sa maong diyalogo. – BANAT NEWS