CEBU, Philippines - Bukas si Bokal Agnes Magpale nga ang tanang mga opisyal sa Kapitolyo ang ipa-ubos sa imbestigasyon sa nabulabog nga kontrobersyal nga pagpalit sa Balili property deal.
Si Magpale nga miyembro sa giumol nga ad hoc committee sa Hunta probinsyal maoy gitahasan pag-imbestigar sa maong kontrobersiya mitubag sa mga kritikong gustong silang tanang opisyales angayang apilon sa imbestigasyon, kini matud pa niya ilang dawaton.
Mipasabot si Magpale nga wala gyud sila manghunaw sa gamay'ng sipyat nila sa Hunta paghatag og authority ni Gobernador Gwendolyn Garcia kabahin sa maong transaksiyon.
Gitug-an hinuon ni Magpale nga hinayhinay na nila karung nakit-an ang daghang buslot sa maong transaksiyon apan sayo pa kaayo ang pagpakanaug nila og conclusion kabahin niini.
Kagahapong adlawa, ang internal audit gipatawag sa nagpadayong imbestigasyon sa maong kontrobersya, sumala pang Magpale ang tanang tawong makatampo og impormasyon kabahin sa kontrobersya ilang hatagan og higayong makapadayag.
Apan gi-klaru ni Magpale nga bugtong nilang mahimo unya sa pakisusi mao ang pagrekomendar ra gyud nga mapasakaan og reklamo ang masakpang responsable niini ingon man ang pagpatuman og mga kausaban sa proseso sa pagpagawas og kwarta sa Probinsya aron pagsiguro nga dili na masubli ang maong palpak nga transaksiyon. – BANAT NEWS