CEBU, Philippines - Miungot ang bala diha sa ulo sa usa ka drayber sa taxi kinsa kritikal karon ang kahimtang human gidul-itan pagpusil sa gituohang tulisan kagahapon sa kaadlawon diha sa Camella Homes, barangay Lawaan I, dakbayan sa Talisay.
Ang biktima giilang si Oscar Gumera, 45, residente sa Camella Homes sa nahisgutang barangay ug drayber sa Richielda Taxi, nakaangkon og samad pinusilan sa walang tampihak.
Ang biktima gidala sa Talisay City District Hospital apan tungod sa kahimtang niini gibalhin kini sa Vicente Sotto Memorial Medical Center.
Mga alas 2:00 sa kaadlawon miresponde sila si PO3 Arnold Damasco, PO3 Ferdinand Pablo, PO3 Mikie Espina, PO2 Erwin Carbonquillo ug PO2 Stephen Sefuesca uban sa mga Field Training Program (FTP) police sa dapit.
Si Espina sa pakighinabi sa Banat News nagkanayon nga ang ilang naabtan ang biktima nga naghay-ad na sa front seat ug wala na maglihok.
Giingong walay nakakita nga duna kini pasahero nianang tungura maong blangko pa sila sa motibo sa insidente.
Na-recover sa mga polis ang 3310 Nokia cellphone, Seiko nga wrist watch ug ang driver’s license niini diha sa kahon sa taxi nga gimaneho niini apan ang kwarta ug pitaka wala na igkita. – BANAT NEWS