Imnanan gipasidan-an

CEBU, Philippines - Gipasidan-an ni acting Mayor Michael Rama ang tanang namaligya og ilimnong makahubog sa dakbayan nga motuman sa nalatid sa ordinansa aron dili usab mag-atubang og problema kun masakpang nakalapas sa gipatuman nga mga ordinansa sa siyudad.

Kini, human sa insidente niadtong miaging semana nga naglambigit sa uyab sa anak ni Mayor Tomas Osmeña.

Ang dalagita nga si Samantha Elise Diores Benitez giingong gi-harass ni Miguel Osmeña tungod sa kasuko sa naulahi nga nahubog pag-ayo sulod sa Bakak Bar sa dalan Pelaez ang uyab niini.

Ang Bakak Bar namaligya og ilimnong makahubog bisan pa man kun kini atbang sa University of San Carlos Main.

Gawas niini, ang nahisgutang bar gikataho usab nga walay business permit, special permit sa pagpamaligya og ilimnong makahubog.

Multa ug pagkabilanggo ang nagpaabot sa tag-iya ug tagdumala niini base sa nalatid sa City Ordinance 1445 ug City Ordinance 1413.

Gipaabot hinuon nga mapadalhan og show cause order gikan sa city government ang Bakak Bar tungod sa gikatahong mga kalapasan niini.

    Gitataw sa acting mayor nga dili lang unya closure ang atubangon sa maong mga balay patigayon nga nakahimo og kalapasan lakip na ang posibleng kiha.

Apan ang negosyanteng si Jonathan Guardo mihulagway sa mando sa mayor pagpasira sa imnanan nga “business terrorism.”

Si Guardo nagkanayon nga ang isyu naglambigit sa batasan sa anak sa mayor nga nanghulga kang Benitez tungod sa pasangil nga gipasagdan niini ang uyab ni Miguel nga nahubog pag-ayo sulod sa Bakak Bar. – BANAT NEWS