2 ka paltik nga armas gisurender

CEBU, Philippines - Duha ka mga paltik nga armas de fuego ang gideposito sa drop box sa atubangang bahin sa munisipyo sa lungsod sa Sogod niadtong Martes sa alas 8:00 sa buntag.

Si PO2 Lope Arcillas sa Sogod Police Station mibutyag sa Banat News nga ang maong mga paltik nga armas pulos mga kalibre .22 magnum derrenger snubnose, nga pulos walay bala. Matud ni PO2 Arcillas nga epekto kini sa gilusad nilang kampanya nga Oplan Kontra Boga nga hangtod karon padayon nilang giawhag ang tanang mga molupyo sa Sogod nga ipasurender na ang ilang mga armas nga walay lisensya ubos sa nagpadayon nga amnesty program sa gobyerno.

Midugang si PO2 Arcillas nga mao pa kini labing unang higayon nga adunay mideposito og paltik nga armas sa ilang drop box nga gibutang atubangan sa munisipyo.

Hinuon wala nila hisayri ang tawo nga misulod sa drop box sa maong   mga armas apan natino nila nga mga molupyo kini nga naminaw sa awhag sa kapolisan.

Kini samtang gipahugtan pag-ayo karon sa mga otoridad sa   tibuok probinsya sa Sugbo ang pagsakmit sa tanang mga armas nga walay lisensiya.

Gipasabot ni PO2 Arcillas nga ubos sa amnesty program kalikayan sa mga may armas ang kahasol sa prisohan kay dili man sila dakpon kun lukatan nila og lisensya ang ilang armas o kaha ila kining isurender sa kapolisan aron malikayan ang dugang kagubot ilabina sa naghinangat nga election sa 2010. Matud ni PO2 Arcillas nga matag adlaw'ng Martes kada semana ang schedule sa pagbukas sa ilang drop box pagtino kun aduna bay gi-surrender nga mga paltik nga armas. – BANAT NEWS