CEBU, Philippines - Ang kagamhanan sa dakbayan sa Talisay nangayo og mga bomb expert ug mga police diver nga maoy mokuha sa mga vintage bomb diha sa Lagundi Reef aron dili mameligro ang mga mosawom sa nahisgutang lugar.
Si Konsehal Shirley Belleza, chairman sa committee on Tourism Heritage and Historical Affair sa pakighinabi niini sa Banat News kagahapon mibutyag nga sa milabay'ng duha na ka Sabado adunay mga diver nga misawom sa Lagundi Reef ug mitug-an kaniya nga adunay mga vintage bomb ang maong lugar ug kinahanglan kining makuha aron paglikay sa disgrasya.
Ang maong mga bomba gituohang gipanghagbong niadtong ikaduhang gubat sa kalibotan diha sa maong lugar apan wala mamuto.
Si Belleza kinsa gibati og kabalaka mihangyo kang Supt. Henry Binas, hepe sa Talisay City Police Station nga mangayo og mga bomb expert ug mga diver nga police gikan sa ilang provincial headquarter.
Si Belleza nagkanayon nga nagpasalamat siya nga dihang ang nahisgutang reef gidaro sa langyaw nga barko nga mao ang MJ Majuro wala maigo ang mga bomba kay posibleng mobuto kini.
Ang mga bombang makuha gikan sa Lagundi Reef ang dad-on ngadto sa provincial head- quarter sa kapolisan aron kahabwaan kini og mga pulbora ug ang mga kabhang niini ibalik sa siyudad aron ikabutang sa museum.
Si Senior Inspector Noli Cernio, chief operation officer sa Talisay City Police Station sa pakighinabi niini sa Banat News kagahapon nagkanayon nga moapil siya og dive sa Lagundi Reef aron motabang og hipos sa maong mga bomba.
Karong adlawa si Cernio uban sa mga sakop sa Special Reaction Unit (SRU) nga gipangulohan ni PO3 Reynaldo Solante gitakdang mosawom sa maong lugar aron tapokon ang mga vintage bomb, ug karong Sabado sayo sa buntag ang mga matapok nga vintage bomb dalhon ngadto sa provincial headquarter. – BANAT NEWS