Mga opisyal sa Mandaue ipa-Ombudsman

CEBU, Philippines - Mag-atubang og kaso ang mga opisyal sa kagamhanan sa dakbayan sa Mandaue nga nalambigit sa pagpalit sa mga substandard nga mga housing material nga gihatag ngadto sa mga biktima sa sunog sa purok Mangga ug purok Limonsito sa barangay Umapad, dakbayan sa Mandaue.

Si Bise Mayor Carlo Pontico Fortuna sa press conference nga gihimo kagahapon mipasabot nga ilang iduso ngadto sa Ombusdman Visayas ang kaso base usab sa resulta sa imbestigasyon nga gihimo sa giumol nilang komiti sa konseho. Gipasabot niya nga naglakip sa malambigit sa kaso ang mga opisyal nga nag-request, mga sakop sa Bids and Awards Committee (BAC) nga nagdawat sa mga substandard nga mga housing materials ug ang nag-check up niini.

Si Fortuna miingon nga sa canvass nga ilang gihimo sa mga tindahan nga nagbaligya og housing materials ilang nasuta nga gipaburot pag-ayo ang presyo niini bisan og mga reject na ang maong mga materyales.

Ang maong mga materyal naglakip sa mga plywood ug mga sin nga matud pa sa mga nakadawat niini nga nasunogan iglalabay na kay mga busloton kaayo ug dili na angayan pang idapat og balay.

 Samtang si City Atty. Briccio Boholst sa press conference   mikompirmar usab nga mga minus gyud og kalidad ang maong mga dapat sa balay nga gihatag ngadto sa mga biktima sa sunog.

Matud pa niya nga gihimo usab nila ang kaugalingong imbestigasyon ug ilang nasuta nga adunay kamatuoran ang maong reklamo base usab sa resulta sa ilang pasiunang pakisusi. Gipasabot niya nga gihimo pa nila ang pagpalawom sa imbestigasyon aron pagsuta niining tanan. Gipaniguro ni Atty. Boholst nga manubag ang mga opisyal nga maoy nakaingon sa maong kontrobersiya.

Giklaro ni Boholst nga naglakip sa mga lakang nga ilang himoon mao ang pag-uli sa mga housing materials ug ang paghulip niini og maayong klase nga materyales. – BANAT NEWS