2 ka bata gikulata sa opisyal

CEBU, Philippines - Gireklamo sa duha ka manag-agaw nga minor de edad ang usa ka opisyal sa Talamban Police Station sa dakbayan sa Sugbo nga mikulata kanila pinaagi sa pagdapog, pagsukmag ug pagbunalbunal og silhig nga lanot nga maoy nakaingon sa grabe nilang pagkabun-og.

Ang duha ka mga biktima sa pagpamun-og ni Insp. Gerardo Fiel mao sila si Niño, 16, ug Erland, 17, (mga apilyedo gipugngan). Si Niño taga lungsod sa Carmen samtang si Erland taga Basak, Mandaue.

Sumala pa sa duha nga giditiner sila sa Talamban Police Station niadtong Domingo ug ilang gialegar nga gihimo usab ang pagkulata kanila.

Ang Talamban Police Station mitugyan usab sa duha nila ka dinakpan nga minor de edad ngadto sa Presinto 3 sa Basak Police Station sa dakbayan sa Mandaue ug mga polis sa maong presinto mao na usab ang nagtugyan ngadto sa mga ginikanan niini.

Apan namatikdan sa mga ginikanan sa duha ka bata aduna kini mga bun-og. Mireklamo sila sa usa ka sibyaanan sa radyo kinsa mitugyan usab niini ngadto kang Bise Mayor Carlo Pontico Fortuna. Si Fortuna miingon nga iyang gipresentar ang duha ka mga biktima ngadto kang Bise Mayor Michael Rama alang usab sa paghatag og kasayuran sa maong insidente. 

Giasoy sa duha ka bata nga nanuroy sila aron mamalit og scrap sa Pit-os apan gipasanginlan silang mga kawatan nga maoy hinungdan nga gidakop sila ug giditiner sa Talamban Police Station.

Sa dihang didto na sila sulod sa Talamban Police Station gisukitsukit sila ni Insp. Fiel nga maoy shift supervisor sa nahisgotang presinto sa kapolisan.

Dugang pa nga alegasyon sa duha ka mga biktima nga gipatalikod sila ni Insp. Fiel nga nagluhod ug gibunalbunalan sa silhig nga lanot ang ilang mga tiil ug kalawasan.

Si Erland miasoy nga mangatarungan unta siya kay ang ig-agaw gikan pa sa ilang pinuy-anan sa bukirang bahin sa Carmen ug dili pa sinati dinhi sa dakbayan apan gisukmag og gidapog hinuon siya ni Insp. Fiel.

“Ako unta ang motubag sa iyang pangutana kay wala man mahibawo akong ig-agaw sa among gipuy-an,” ni Erland pa sa iyang pamahayag. “Pero, kun mosulti ko iya man hinuon kong sukmagon sa nawong ug dapogon.”

Gitinguha unta sa Banat News pagkuha sa habig ni Insp. Fiel sa gialegar sa mga biktima batok kaniya apan wala kini sa iyang buhatan kagahapon subay usab sa gitug-an ni PO3 Ramon Sanchez sa Talamban Police Station. – BANAT NEWS