CEBU, Philippines - Gihulagway sa lider sa oposisyon sa siyudad sa Sugbo ang anak ni Mayor Tomas Osmeña nga si Miguel Osmeña nga usa ka arogante.
Kini human usab gikataho nga si Miguel nanghulga sa amiga sa iyang uyab pinaagi sa text messages gawas sa giingong pagbutang niini sa Facebook.
Ang anak sa mayor giingong nasuko kang Samantha Elise Diores Benitez tungod sa pagtuo niini nga gibiyaan ang iyang uyab nga nahubog atol sa ilang panag-inom.Gitataw hinuon ni Guardo nga wala na siya masurpresa sa pagka-arogante ni Miguel ug sa gihimo niining pagpang-harass kang Benitez.
Kini tungod kay giingong ingon usab niini ang gihimo sa mayor ngadto kanilang mga sakop sa oposisyon dinhi sa dakbayan.
“Me and Mary Ann (delos Santos) are also victims of their harassment, almost all of my 1,000 pairs of basketball boards have been taken down by City Hall,” sumala ni Guardo.
Gawas niini miingon ang lider sa oposisyon nga gidid-an usab ang ilang basketball ug boxing tournament nga mapahigayon sa kabarangayan sa dakbayan.
Midugang si Guardo nga nakasinati usab og pagpanghulga ang ilang kaalyadong mga barangay kapitan kun dili mobali sa Bando Osmeña Pundok Kauswagan (BOPK).
Alang sa lider sa oposisyon nga dili na ikahibulong ang pagka-arogante ug pagpang-harass ni Miguel tungod kay giingong ingon usab niini ang amahan.
“Kung unsa ang punuan, mao sab ang bunga,” nagkanayon si Guardo sa text messages nga iyang gipadala ngadto sa mga tigbalita.
Gitataw hinuon sa lider sa oposisyon nga siya mas labaw'ng nahadlok kang Miguel itandi sa amahan niini nga si Osmeña.
“The good thing about my on-going debate with mayor Osmeña is that it’s purely a discussion of a lot of issues…pero kaning kang Miguel, murag mahadlok ko ani niya, dili lang ta mag-apil-apil oy, pusilan pa lang ta,”dugang pamahayag ni Guardo.
Wala hinuoy rekord ang batan-ong Osmeña nga abusado ug dunay tawong gipasakitan gawas lang sa labing awahing insidente sa pagpanghulga.
Apan una nang gipasalig ni Osmeña nga dili manakit ang iyang anak ni bisan kinsa ilabi na ngadto sa mga kababayen-an ug kun manakit kini, mo-resign siya sa katungdanan.
Samtang si Cebu City Police director Patrocinio Comendador nagkanayon nga dili pa siya makamando og imbestigasyon sa gikatahong pagpang-harass ni Miguel. Giangkon hinuon ni Comendador nga nakahibalo siya sa insidente human siya gipahibalo ni Chief Insp. Claudio Casiba sa Mabolo Police Station human magpa-blotter ang pamilya ni Benitez.
Matud ni Comendador nga ang inahan ni Benitez igo lang nagkuha og police report.
Si Comendador mipasalig hinuon nga mohimo og imbestigasyon kun moluwat og pamahayag si Benitez ug mosumiter sa digital camera nga adunay agi sa bala ug sa cellphone. – BANAT NEWS