CEBU, Philippines - Naugdaw ang usa ka balay nga nasunog didto sa Sitio Daanglungsod, barangay Poblacion Uno, lungsod sa Malabuyoc niadtong Domingo sa alas 7:30 sa gabii.
Ang balay nga nasunog gipanag-iya ni Tomasita Quiobi, 76, byuda, nga taga Daanglungsod usab.
Matud ni PO1 Gilbert Ygot sa Malabuyoc Police Station nga nahinabi sa Banat News nga usa ka molupyo ang mitawag ug mipahibawo sa ilang buhatan kabahin sa maong sunog ug gitubag dayon ang maong alarma sa kabomberohan sa lungsod.
Gani mitabang usab ang mga bombero sa mga silingang lungsod sama sa Alegria ug Ginatilan apan naugdaw gyud ang maong balay nga ginama sa mga gaan kayong mga dapat.
Mikabat sa P100 mil ang katibuk-ang kadaot sa maong sunog ug maayo nalang kay walay kinabuhing naangin. – BANAT NEWS