Suwat sa mayor gigisi ug gilud-an

CEBU, Philippines - Ang babayeng nangangkong lider sa urban poor diha sa sitio Kalmar, barangay Lawaan I, dakbayan sa Talisay migisi-gisi ug gilud-an kuno ang suwat ni Mayor Socrates Fernandez nga nagmando kaniya nga ipalarot ang iyang koral sa basketball court sa maong lugar.

Si kapitan Jerson Laceda mitug-an sa Banat News nga nakadawat siya og taho nga mao kini gibuhat ni Estrella Bas, presidente sa Kalmar Urban Poor Community Association (KUPCA) nga matud pa usa ka dakong insulto sa mayor.

Kahinumdoman nga niadtong milabayng semana nagpanon ngadto sa buhatan sa mayor ang mga taga Kalmar kay mireklamo sa pagpakoral ni Bas sa ilang basketball court kay gipatukoran kini og unom ka balay sa mga miyembro sa KUPCA.

Tungod niini ang mayor nagpadala dayon og suwat kang Bas nga nagmando niining ipalarot ang koral sa basketball court ug gihatagan si Bas og pito ka adlaw apan gikatahong wala tahora ni Bas ang maong suwat ug iya pa hinuong gi-gisi-gisi ug giluwaan.

Hinuon kining tanan gipanghimakak ni Bas dihang gisukit siya sa Banat News kagahapon.

Matud niya nga iyang gihiposan ang maong suwat sa mayor apan patukoron gyud niya og balay sa iyang mga sakop ang maong korte sa basketball. – BANAT NEWS