Nanghagis mao hinuoy natigbasan

CEBU, Philippines - Lalaking nanghagis ug nangita og away natigbasan sa iyang silingan sa barangay Hingat-onan lungsod sa Balamban niadtong Domingo sa alas 11:00 sa gabii.

Ang biktima nga nakaangkon og tinigbasan sa iyang kalawasan mao si Danilo Artajo, molupyo sa nahisgutang lugar samtang ang suspek mao ra usab ang iyang silingang si Armando Montero, 41, nagpuyo gihapon sa maong lugar.

Matud pa ni PO2 Jose Baldecasa sa Balamban Police dihang nahinabi sa Banat News ang biktima nagkuyog sa igsuon niining si Gaudencio gawas sa ilang balay ug nagsabasaba.

Gikatahong kalit lang nag-wild ang biktima ug nanghagit og away sa suspek samtang nagunit og kutsilyo ug paglabay sa pipila ka gutlo midasmag kini sa suspek ug nanunggab, ang suspek naigo sa walang bahin sa paa apan aksidenteng natumba sa yuta ang biktima.

Ang suspek nga nagdala usab og sundang niadtong tungura mibawos og tigbas sa nagkisi-kising biktima diha sa yuta hinungdan sa mga naangkon niining daghang samad dinunggaban sa lawas.

Ang suspek daling mibiya ug mitahan sa barangay kapitan nga si Florencio Pesanon kinsa mao nay midala kaniya sa buhatan sa kapulisan. – BANAT NEWS