Malversation gi-file

CEBU, Philippines - Giduso na kagahapon diha sa buhatan sa Ombudsman Visayas ang kasong malversation of public funds ni Barangay Kapitan Glenn Bercede sa barangay Banilad, dakbayan sa Mandaue batok kang Bise Mayor Carlo Pontico Fortuna.

Gihulagway ni Kapitan Bercede nga una pa lamang kini sa mga kasong ilang ipasaka batok sa maong opisyal sa dakbayan dihang gikahinabi sa Banat News kagahapon.

Si Bercede misang-at sa maong kaso gumikan sa pasangil nga padayong nagdawatan og transportation allowance ang bise mayor gikan sa dakbayan bisan paman kini na-isyuhan na og service vehicle sa kagamhanan.

Si Fortuna sa nauna nang pamahayag kabahin sa maong kaso mipasabot nga tinuod nga may Starex van nga wala sa iya gi-isyu ang maong sakyanan sanglit kini alang man sa Sangguniang Panglungsod (SP).

Nahitabo lang nga siya maoy mipirma pagdawat sa maong sakyanan sanglit siya man ang pangulo sa SP sa dakbayan.

Gitataw ni Fortuna nga walay pag-usik-usik sa kwarta sa katawhan nga iyang nahimo sanglit personal man niyang kwarta ang gipalit og gasolina nga gipatubil niini.    

 Samtang si Atty. Francisco Amit, sakop sa management team ni Mayor Jonas Cortes miingon nga giilang luho nga sakyanan ang Starex van ug nagkinahanglan kini og presidential authority ug mayor’s authority.

“Unya, unsaon man na niya kun dili mohatag ang mayor og authority? Iyang ibalik sa dealer sa maong sakyanan luoy kaayo kay second hand na man na kay gigamit na gud na niya,” sumala pang Amit.

Samtang giangkon ni Bercede nga iyang gipangunayan ang pagsang-at og kaso kang Fortuna dili lang isip ordinaryong magbubuhis sa dakbayan kundili nagbaton usab og personal nga kasayuran sa gihimong kalapasan sa iyang kanhi kauban nga konsehal. – BANAT NEWS